أحلي ما يقال

ورب الكعبة الرسمك حلوه وخلّه عيونك ياها مناي
وفصّل وجهك أحسن لوحه فيهو ملامحك بيها دواي
رصّ قوامك أروع متحف وحتي ندايا الليكي وفاي
بقيتي الأمل الليهو بعاين وكنت الدرب الفيهو خطاي
وإنت الصبح الذّين ذاتي وشال الضٌلمه الكان جوّاي
عليكي تفتش كل اعضائي وحتي الموج سمعتو نداي
ويا شوقي الليكا إشتقت حليل جلساتك وانت معاي
غاب الفرح الفيهو سكنت وذاد الشوق البيهو رجاي
ويا نجماً ليكا هجدت عايزك تاخد وتدي حكاي
ونادي الورد السارق لونه وجيب الصوره المالكه رؤاي
عايز اتمعن فيها بدونه وأخلي خيالا يكون حكّاي
قادر اصبّر نفسي لباكر صبر أيوب ودرتو معاي
انا لازم ارجع ليك من تاني وتطلع شمسك ليّا براي
وأقعد تاني أحكي معاك ويصبح قربك ياهو مناي
تفرح روحي بلمس إيديك
ويهتف قلبك
بي طول حٍسُّو
يمين بالله نفس الراي...........

PORTSUDAN
4/ 2010
ABRAHIM HASHIM